C.O. - Prensa - Diócesis San Sebastian

Posible al da mundu diferente bat? Sinesten badugu, zergatik ez da posible izango? Ba al dugu itxaropenik beste mundu bat, guztiontzako mundu hobe, gizakoiago eta duinago bat posible dela sinesteko?

Indian, Kalkuta hiriburuan, Sealdah tren geltokira joan ezkero, noraezean galduta dabilen makina bat jenderekin egingo dugu topo. Horietako bat zen Minuti, emakume gazte bat. Hezur eta azal, bere aurpegian ez zegoen gaztetasun arrastorik ere. Bere gorputzean, jipoien zauriak ageri ziren. Bere begiradan, mesfidantza eta beldurra. Bere bihotzean, mina eta etsipena.

Calcutan, Ama Teresaren ordenan ari diren gizon-emakumeak sarri joaten dira Sealdah geltokira. Makina bat aldiz saiatu ziren Minuti geltokitik eta miseriatik ateratzen. Baina ezin. Emakumeak ez zien uzten arrimatu ere egiten. Alde egiten zien. Auskalo zer tratu txar eta bortxaketa jasan zituen! Ia etsita, Ama Teresaren elkartekoek Calcuta Ondoan ONGko Izaskuni esan zioten: «joan zaitez zu, ea zuri entzuten eta obeditzen dizun» –izan ere, obeditu «audire»tik baitator, alegia, entzun eta aditu esan nahi du–.

Joan zen Izaskun Minutirengana eta besoan ukitu zion, emeki-emeki. Neskak harrika egiteko imintzioz erantzun zion. Ez zen fio. Ikasita zegoen norbait inguratzea arriskutsua zela berarentzat. Nahita ere, inork ezin izaten zion Minutiri lagundu, izuak baitzeukan menpean hartuta. Berriz ere, alde egin behar zien.

Izaskunek, errukiturik, Jainkoari eskatu zion: «Jauna, atera ezazu neska hau ifernu honetatik». Ondoren, neskari deitu eta esan zion: «Didi, amar Didi! Dekho, sundhor aché?*», hau da, «Ahizpa, ahizpa maitea, ikusi! Polita al da?», soineko bat erakusten ziolarik. Neska, itzuli eta urrutitik begiratu zion. Bat-batean, Izaskunengana hurbiltzen hasi zen. Hitzik esan gabe soinekoa hartu eta jantzi egin zuen.

Orduan, Izaskun taxi baterantz abiatu zen. Atzetik jarraitzen zion Minutik. Izaskunek, taldeko gizonezkoak –bere senar Iñigo eta besteak– aldendu egin zituen, bai baitzekien Minutik gizonak ezin zituela ikusi ere egin, beldurraren beldurrez. Taldeko besteek harrituta ikusten zuten gertatu zen aldaketa.

Sartu zen Izaskun taxian. Minuti bere ondoan eseri zen. Ama Teresaren etxeetako batera eraman zuten, lehen sendaketak egin eta han zain zezaten. Han utzi zuen Izaskunek Minuti, agur esan eta gero.

Handik urtebetera, Calcuta Ondoan Erakunde katolikoak, etxe bat eraiki zuen Kalkutatik hurbil. Etxerik gabe, kalean galduta eta etsita bizi den jendea hartzeko etxea da. Joan ziren Izaskun eta Iñigo Ashabari egoitzara. Ashabari da etxearen izena, eta esan nahi du Itxaropenaren etxea.

Sartu ziren Izaskun eta Iñigo Ashabarin. Sartu orduko, korrika etorri zitzaion neska gazte bat Izaskuni bere besoetara. Izaskun harrituta geratu zen eta galdetu zuen ea nor zen gazte hura. «Ez al duzu ezagutzen? Minuti da, Calcutako geltokitik atera zenuen berbera». Izaskunek ez zuen ezagutu, Ashabariko neska hark ez baitzuen Sealdah geltokiko emakumearen antz arrastorik, hain aldatuta zegoen. Antzaldatuta! Bere onera etorria zen, hogeita hamar kilo irabazi zituen, eta begiradan ez zegoen mesfidantzarik, beldurrik, iluntasunik. Poza ageri zen bere begietan. Gaztea esker onez zegoen Izaskunen besoetan. Minuti gogoratzen zen Izaskunekin. Minutik ezagutu zuen bere laguna. Eta pozez gainezka zegoen, zoriontsu bere ondoan.

Hasierako galdera jartzen dugu berriro: Posible da beste mundu bat? Ireki diezaiogun itxaropenari atea. Sar gaitezen Ashabarin. Ikusiko dugu Jainkoaren aurpegia argazkietan: minez dudenengan, Jesusen negarra sumatuko dugu. Izaskunen errukizko harreran Jesusen Espiritua nabariko dugu. Bi emakumeen besarkadan, Amaren bihotzez maite gaituen Jainko Aitaren maitasun xamurra sentituko dugu. Minutiren aurpegi alaian, Jesusen eta berak erakutsi digun Jainkoaren poz hunkigarria. Orduan ikusiko dugu, Jainkoaren Erreinua eraikitzen ariko garela batzuk besteekin, elkar harturik.

* Didi bengalierazko hitza da eta esan nahi du ahizpa nagusia. Begirunez, errespetuz erabiltzen den hitza da, zaharragoa den emakumeari deitzeko erabiltzen dena.

Para más información o colaboración con la ONG Calcuta Ondoan:
teléfono 943-431.849
página web: http://www.calcutaondoan.org/

Enlace original a esta página:
http://www.elizagipuzkoa.org/home/index.php?moduleName=Solasean&hizk=eu